По повод 1 Мај – Меѓународниот ден на трудот, упатуваме искрена честитка до сите работници во енергетскиот сектор – од рудниците, преку електраните, до мрежите за пренос и дистрибуција на енергија.
Почитувани работници на енергетскиот сектор, Почитувани рудари, енергетичари, техничари, инженери, геолози, електричари, оператори и сите што го движите срцето на енергетскиот систем – ви го честитам 1 Мај, Денот на трудот, со длабока почит за тоа што секојдневно го вложувате.
Без вашиот труд – нема струја, нема топлина, нема индустрија. Вие сте тие што ја носите енергијата до секој дом, под земја и на далновод, во смени, во тешки услови, и секогаш со одговорност. Вие не сте само дел од системот – вие сте силата што ја држи државата исправена.
Вашиот посветен труд, вложената сила и знаење се двигател на нашата економија и гаранција за енергетската стабилност на државата. Благодарение на вас, и во најтешките услови, енергијата не запира – ниту за домаќинствата, ниту за стопанството.
Како министерка за енергетика, рударство и минерални суровини, ќе продолжам да се борам за подобри услови, за поголема поддршка, и за повеќе вреднување на секој чесен работник во нашиот сектор. Вашиот труд не смее да остане незабележан.
Министерството за енергетика, рударство и минерални суровини останува силен партнер на секој енергетски работник и ќе продолжи да работи на создавање стабилна иднина на енергетскиот сектор.
Денес, на 1 Мај, ние го славиме вашиот труд – Вие сте оние кои ја прават разликата.
Со благодарност и почит,
Сања Божиновска Министерка за енергетика, рударство и минерални суровини
