Министерката за енергетика, рударство и минерални суровини, Сања Божиновска, ќе предводи серија значајни активности во Солун, Грција, кои имаат за цел да ја зацврстат позицијата на Македонија како клучен енергетски коридор и стабилен партнер во регионот на Југоисточна Европа. Овие настани претставуваат историски чекор кон енергетска независност, диверзификација и интеграција во европските енергетски текови.
Министерката Божиновска ќе биде почесен гостин и главен говорник на Sixth Thessaloniki Metropolitan Summit, организиран од реномираниот The Economist. На самитот, насловен „Axis 2030: Powering connectivity, unlocking growth for south-east Europe“, таа ќе се обрати пред високи претставници од политичкиот, економскиот и бизнис сектор од Грција, регионот и Европа. Во своето обраќање на овој настан, предвидено е Божиновска да ја потенцира стратешката важност на енергетската безбедност, а фокус ќе биде ставен и на историскиот чекор на Македонија со приклучувањето кон Вертикалниот гасен коридор.
Покрај учеството на Самитот на The Economist, министерката Божиновска ќе земе активно учество и на јубилејниот 10. Southeast Europe Energy Forum – SEEF2026, организиран од Американско-грчката стопанска комора и Грчката асоцијација за енергетска економија. На овој значаен форум, министерката ќе ги презентира стратешките приоритети на Македонија во контекст на енергетската безбедност, диверзификацијата, регионалната инфраструктура и создавањето конкурентен енергетски пазар. Таа ќе ги претстави клучните инфраструктурни проекти, како гасниот интерконектор со Грција и Вертикалниот гасен коридор, нагласувајќи ја важноста на регионалната поврзаност и инвестициите во обновливи извори и модернизација на мрежата.
Круна на активностите во Солун ќе биде потпишувањето на заедничката декларација за пристапување на Македонија кон рамката за соработка на Вертикалниот гасен коридор. Овој историски настан претставува крај на повеќедецениската зависност од еден извор на гас и отвора нова ера на енергетска безбедност и диверзификација. Со овој потег, Македонија се интегрира во координирана регионална инфраструктура, овозможувајќи поголема конкуренција и сигурност во снабдувањето.
Овие активности се резултат на интензивните дипломатски напори и преговори на Министерството за енергетика, рударство и минерални суровини, предводени од министерката Божиновска, кои вклучуваа средби во Вашингтон и Атина.
Министерството останува посветено на континуирана изградба на сигурен, диверзифициран и модерен енергетски систем, интегриран во европските текови и подготвен за иднината.
Со почит,
Министерство за енергетика, рудраство и минерални суровини