Во Владата денес се одржа координативен состанок со претставници на Алијансата за единствен пазар на податоци, иницијатива која обединува владини институции, меѓународни организации и технолошки компании со цел создавање дигитална инфраструктура за размена на податоци и поддршка на зелената транзиција. Освен претставници на алијансата присуствуваа и претставници на Фондацијата HBAR кој изразија намера за поддршка во финансирањето на проектите од овој тип, како и претставници на Реактив, за обезбедување на локалниот контекст и поддршка за спроведувањето на Иницијативата.
На состанокот беа претставени клучните иницијативи на Алијансата, вклучувајќи решенија за известување, дигитална инфраструктура за тргување со емисии и можности за инвестиции во зелени технологии. Се разговараше за можностите што ги нуди оваа иницијатива во контекст на дигиталната трансформација, размената на податоци и поддршката за зелената транзиција.
Генералниот секретар на Владата, Игор Јанушев, нагласи дека Владата е посветена на унапредување на дигиталната и енергетската трансформација преку партнерства со меѓународни организации и технолошки компании.
„Овој настан доаѓа во време кога Владата на Македонија активно ја спроведува Националната развојна стратегија за периодот 2024 – 2044 година. Во рамките на оваа стратегија, енергетиката е клучен сегмент, не само во однос на економската стабилност, туку и во контекст на климатските промени и зелената транзиција. Задоволство ни е што Владата е домаќин на оваа група експерти и професионалци кои ги здружуваат силите за дигитална и зелена трансформација на нашата економија. Признати експерти, користејќи дигитални решенија со докажан успех. Што е уште поважно, се нуди можност да ја водиме оваа иницијатива и да ја позиционираме Македонија како регионален лидер во одржливост и дигитални иновации, а во исто време да ја поттикнеме нашата економска отпорност и еколошки напредок.“, истакна Јанушев.
„Македонија останува посветена на дигиталната трансформација и зелената агенда, поддршка за мали и средни претпријатија во преминот кон јаглеродно неутрална економија. Владата активно работи на усогласување со европските регулативи како CBAM (Механизмот за прилагодување на јаглеродните граници) и CSRD (Директивата за корпоративно известување за одржливост), што ќе има значајно влијание врз македонските компании, особено во индустриските сектори кои извезуваат во ЕУ. Што ќе придонесе за економска стабилност и одржлив развој.“ изјави министерката Божиновска.
Во рамките на дискусијата беа идентификувани можности за соработка во областа на тргување со емисии, инвестирање во зелени технологии и развој на дигитални алатки кои ќе ги олеснат процесите на усогласување со европските барања. Претставниците на Владата и меѓународните партнери споделија ставови за натамошната соработка во овие области, а разговорите ќе продолжат во насока на утврдување на конкретни чекори за заеднички иницијативи.
Овој состанок претставува чекор напред во напорите на Македонија за подобрување на економската конкурентност и креирање на услови за одржлив развој преку дигитална и еколошка транзиција.
