Ministria e Energjisë, Minierave dhe Burimeve Minerale, në bashkëpunim me Bankën Evropiane për Rindërtim dhe Zhvillim (BERZH), ka nisur procesin e prezantimit të mekanizmit “Kontrata për Diferencë” (Contract-for-Difference – CfD) si një model i ri për mbështetjen e investimeve në burimet e rinovueshme të energjisë.
Modeli CfD, tashmë i dëshmuar në BE, do të përshpejtojë investimet në kapacitete të energjisë së rinovueshme dhe njëkohësisht do t’i mbrojë konsumatorët nga paqëndrueshmëria e tregut.
Në takimin hapës të mbajtur sot, ministrja Sanja Bozhinovska theksoi se CfD nuk është vetëm një instrument financiar, por një ndryshim sistemor që siguron stabilitet për investitorët dhe mbrojtje për konsumatorët.
“Me këtë reformë, ne vendosim kushte të parashikueshme dhe të qëndrueshme për investime në kapacitete diellore dhe me erë, duke përshpejtuar objektivat tona ambicioze – 1.7 GW energji e rinovueshme deri në vitin 2030. Mekanizmi CfD sjell siguri, kosto më të ulëta dhe një treg konkurrues, që është thelbësor për tranzicionin e shpejtë drejt energjisë së pastër,” deklaroi ministrja Bozhinovska.
Me mbështetjen e BERZH-it dhe ekspertizën nga partnerët ndërkombëtarë, Maqedonia do ta përshtasë këtë mekanizëm për tregun lokal të energjisë, duke hapur mundësi të reja për investitorët. Pritet që kjo të çojë në zhvillim të përshpejtuar të burimeve të rinovueshme dhe çmime afatgjata të qëndrueshme për konsumatorët.
Procesi i përgatitjes do të vazhdojë në muajt në vijim, me një analizë të detajuar të aspektit rregullator dhe financiar, me synimin për të krijuar një model që sjell rezultate reale dhe të qëndrueshme për sektorin energjetik të Maqedonisë.
Me respekt,
Ministria e Energjisë, Minierave dhe Burimeve Minerale
