Ministrja e Energjisë, Sanja Bozhinovska, zhvilloi një takim me Bordin drejtues të ZELS-it, ku tema kryesore ishin kostot e larta të energjisë elektrike me të cilat përballen ndërmarrjet publike, shkollat, komunat dhe ndriçimi publik. U shqyrtuan disa zgjidhje dhe masa të mundshme që do të ndihmojnë në uljen e kostove të energjisë për institucionet publike.
✅ Model i unifikuar për prokurime publike
Komunave do t’u vihet në dispozicion një model i vetëm për prokurimin publik të energjisë elektrike, i përgatitur në bashkëpunim me Byro-në për Prokurime Publike. Kjo do të sigurojë çmime më të favorshme, më shumë transparencë dhe shmangien e shpenzimeve të panevojshme.
✅ Mbështetje për prokurimin e energjisë
Nga Ministria do të caktohen persona kontaktues që do të ofrojnë këshillim gjatë prokurimit të energjisë elektrike nga institucionet.
✅ Blerja e energjisë përmes bursës maqedonase
Institucionet publike do të orientohen të blejnë energji përmes Bursës Maqedonase të Energjisë (MEMO), me synimin që kjo bursë të jetë referenca kryesore, në vend të bursave të huaja si HUPX. Kjo do të ndihmojë në shmangien e kostove shtesë të transmetimit dhe detyrimeve të tjera.
✅ Projekte për efikasitet energjetik
Komunat kërkuan mbështetje nga Ministria për realizimin e projekteve për efikasitet energjetik. Disa prej tyre kanë ndërmarrje të veta dhe panele fotovoltaike, por përballen me pengesa administrative për të marrë leje për shitjen e tepricës së energjisë. Ministria do të ndihmojë në kapërcimin e këtyre pengesave.
✅ Ndriçimi i mençur i rrugëve
Rreth 60% e komunave tashmë kanë zbatuar zgjidhje “smart” për ndriçimin rrugor, duke ulur ndjeshëm faturat e energjisë. Komunat e tjera do të inkurajohen ta ndjekin këtë shembull.
✅ Përgjegjësi për menaxhim të dobët të energjisë
U ngrit çështja e përgjegjësisë penale në rastet e keqmenaxhimit të prokurimeve publike, vonesave dhe planifikimit të papërshtatshëm që çojnë në humbje financiare dhe borxhe.
✅ Projektet për efikasitet energjetik nën kompetencë të Ministrisë
Komunat kërkuan që projektet për efikasitet energjetik të realizohen në mënyrë të centralizuar përmes Ministrisë së Energjisë për efikasitet dhe zbatim më të shpejtë.
Ministria e Energjisë mbetet e përkushtuar për të gjetur zgjidhje të qëndrueshme për uljen e kostove të energjisë në sektorin publik dhe përmirësimin e efikasitetit energjetik në komuna. Masat shtesë do të diskutohen në koordinim me Qeverinë dhe institucionet e përfshira.
U diskutua gjithashtu për aktivitetet që komunat mund të ndërmarrin në bashkëpunim me ministrinë, për realizimin e projekteve që do të rrisin efikasitetin energjetik, do të ulin kostot dhe do të përmirësojnë kushtet e jetesës së qytetarëve.
Me respekt,
Ministria e Energjisë, Minierave dhe Burimeve Minerale
