Sot në Shkup u mbajt një takim i Komitetit të Punes për Strategjinë Kombëtare të Zhvillimit (SKZ). SKZ është një trup këshillimor i Qeverisë, i cili ofron mbështetje ekspertizë dhe teknike për zbatimin e Strategjisë Kombëtare të Zhvillimit 2024-2044. Aktivitetet kanë për qëllim arritjen e objektivave për rritje ekonomike, drejtësi sociale dhe zhvillim të qëndrueshëm të përcaktuara nga strategjia.
Sekretari i Përgjithshëm i Qeverisë, z. Igor Janusev, mbajti një fjalim hyrës, duke theksuar rëndësinë e kësaj iniciative dhe duke shprehur falënderimet ndaj UNDP-së dhe Ministrisë së Financave të Republikës së Sllovakisë për mbështetje. Janusev theksoi se miratimi i Strategjisë Kombëtare të Zhvillimit 2024-2044 dhe Programit të Zbatimit 2024-2028 shënon fillimin e një procesi serioz të zhvillimit afatgjatë të vendit.
Ministrja për Energjitikë, Minerale dhe Miniera, znj. Sanja Bozhinovska, në fjalën e saj tha se, megjithëse rruga është plot sfida, ajo hap mundësi të reja që duhet të shfrytëzohen.
“Maķedonia përballet me sfida të rëndësishme në sektorin e energjisë. Edhe pse konsumi i energjisë për frymë është më i ulët se mesatarja e BE-së, kemi një nivel të lartë të varfërisë energjetike dhe degradimit mjedisor. Në vitin 2020, 24% e popullsisë përballeshin me varfëri energjetike, tri herë më shumë se mesatarja e BE-së. Qëllimi ynë është të balancojmë uljen e varfërisë energjetike dhe rritjen e produktivitetit ekonomik duke përmbushur standardet mjedisore. Prioritet do të jetë kalimi në energji të pastër dhe rritja e efikasitetit të energjisë në të gjitha sektorët, veçanërisht përmes mbështetjes për grupet vulnerabël, si gratë dhe rajonet më pak të zhvilluara. Po ashtu, do të investojmë në teknologji moderne dhe burime të rinovueshme për efikasitet më të madh të energjisë në industri dhe shtëpi. Përmes kalimit të drejtë në sektorin e energjisë, do të krijojmë vende të punës në sektorin e energjisë së gjelbër dhe do të mundësojmë barazi gjinore në projektet e reja,” tha ministrja Bozhinovska.
Ministrja theksoi se dy deri në tre vitet e para janë kyçe për zbatimin e masave më të rëndësishme dhe i bëri thirrje anëtarëve të Komitetit të Punes të propozojnë masa konkrete për realizimin e shpejtë.
“Me përpjekje të bashkuara nga të gjithë partnerët mund të ndërtojmë një të ardhme të gjelbër dhe të qëndrueshme që do të jetë më e mirë për të gjithë ne,” theksoi ministrja Bozhinovska.
Ministria për Energjitikë, Minerale dhe Miniera po punon në përgatitjen e një Ligji të ri për Energjitikën dhe Ligji për Burimet e Rinovueshme të Energjisë. Grupi i punës, i përbërë nga përfaqësues të institucioneve përkatëse, kompanive të energjisë, dhomave të tregtisë dhe shoqatave të prodhuesve të energjisë elektrike, është duke përgatitur tekstin e ligjit. Ligji i propozuar pritet të dorëzohet në Kuvend deri në fillim të dhjetorit, në përputhje me obligimet e marra me Marrëveshjen për krijimin e Komunitetit të Energjisë.
Strategjia Kombëtare e Zhvillimit (SKZ) është një dokument vizionar për 20 vitet e ardhshme, që e drejton vendin drejt zhvillimit afatgjatë përmes modelit të katërfishtë të helikës, duke mundësuar bashkëpunim të integruar mes shtetit, sektorit të biznesit, akademisë dhe sektorit civil. Gjatë periudhës së ardhshme do të zhvillohen veprime konkrete për realizimin e strategjisë.
