Ministrja e Energjisë, Minierëve dhe Lëndëve Minerale, Sanja Bozhinovska, iu drejtua Këshillit Ministror të 22-të të Komunitetit Energjitik që u mbajt në Vjenë, Austri.
Gjatë Këshillit Ministror të Komunitetit Energjitik, në të cilin morën pjesë ministrat përgjegjës për energjinë nga nëntë shtetet nënshkruese të Marrëveshjes për Komunitetin Energjitik, u diskutua për përmirësimin e hartës rrugore për dekarbonizimin, si dhe për tema që lidhen me menaxhimin e ujërave, habitatet dhe shpendët e egër, në drejtim të implementimit të detyrimeve shtesë ligjore në këto fusha në të ardhmen.
Në fjalimin e saj, Bozhinovska theksoi angazhimin e vendit për kalimin në energji të pastër, qëndrueshmërinë ekonomike dhe neutralitetin klimatik. Ajo theksoi përparimin e bërë në sektorin energjetik, veçanërisht në fushën e legjislacionit dhe harmonizimin e rregulloreve kombëtare me legjislacionin evropian. Ministrja e informoi të pranishmit për aktivitetet intensive të Ministrisë së Energjisë, Minierëve dhe Lëndëve Minerale për realizimin e projekteve kyçe infrastrukturore që do të eliminojnë barrierat teknike në rrjetin energjetik dhe do të forcojnë bashkëpunimin rajonal.
„Ne po punojmë intensivisht në lidhjen aktuale të energjisë me Shqipërinë, do të vazhdojmë të lidhemi me Greqinë, Serbinë dhe Kosovën dhe në të njëjtën kohë do të vazhdojmë të modernizojmë rrjetin tonë elektrik, i cili do të mundësojë integrimin e mëtejshëm të energjisë nga burime të rinovueshme. Këto projekte do të stimulojnë rritjen ekonomike dhe do të rrisin sigurinë e furnizimit me energji. Po ashtu, përmirësimi i lidhjes energjetike përmes integrimit të tregut kombëtar të energjisë elektrike me tregun e vetëm evropian të energjisë elektrike do të sigurojë çmime stabile, konkurrueshmëri dhe qasje më të mirë në burimet e energjisë së rinovueshme. Me padurim presim të vazhdojmë me bashkimin e tregut të energjisë elektrike sa më shpejt të jetë e mundur. Ne jemi të angazhuar për të realizuar dhe detyrimet tona klimatike,” tha Bozhinovska në fjalimin e saj.
Në takimin e Komunitetit Energjitik, përveç ministres Bozhinovska, mori pjesë edhe Zëvendëskryeministri i Parë dhe Ministri i Mjedisit dhe Planifikimit Hapësinor, Izet Mezhiti.
Komuniteti Energjitik është një organizatë ndërkombëtare që lehtëson bashkëpunimin energjetik mes BE-së dhe nëntë shteteve nënshkruese: Maqedonia e Veriut, Shqipëria, Bosnja dhe Hercegovina, Kosova, Gjeorgjia, Moldavia, Mali i Zi, Serbia dhe Ukraina, me tre vëzhgues të përhershëm: Armeni, Norvegji dhe Turqi. Qëllimi kryesor i saj është të afrojë shtetet nënshkruese me BE-në përmes lehtësimit të reformave dhe zgjerimit gradual të legjislacionit të BE-së për energjinë, mjedisin dhe klimën.
