Investimet në burimet e rinovueshme të energjisë, mbrojtja e mjedisit, përfitimet nga skenari i energjisë së gjelbër dhe ndikimi i ndryshimeve klimatike ishin në fokusin e takimit të Ministres së Energjisë, Minierave dhe Burimeve Minerale, Sanja Bozinovska, me Erin Elizabeth McKee, Ndihmës Drejtoreshë e USAID për Evropën dhe Euroazinë. Takimi, i mbajtur gjatë vizitës së punës së Bozinovska në SHBA dhe ku mori pjesë edhe Zëvendëskryeministri dhe Ministri i Mjedisit dhe Planifikimit Hapësinor Izet Mexhiti, theksoi angazhimin e USAID për realizimin e projekteve me interes publik.
"Diskutuam për potencialet e vendit për të nisur iniciativa dhe projekte të reja që do të na ndihmojnë të ecim më lehtë drejt tranzicionit të gjelbër dhe reduktimit të emetimeve të dioksidit të karbonit. Stabiliteti politik është thelbësor për krijimin e një klime për tërheqjen e investimeve të huaja. Ndamë qëndrime të ngjashme për nevojën e bashkëpunimit të vazhdueshëm për të përballuar sfidat mjedisore dhe për të mbështetur iniciativat e gjelbra që do të ndihmojnë zhvillimin e qëndrueshëm dhe mbrojtjen e mjedisit në rajonin e Evropës Juglindore," theksoi Bozinovska.
Ajo së fundmi realizoi një takim pune me një delegacion të USAID të udhëhequr nga Jerry Dible, Përfaqësuesi i USAID për Maqedoninë, ku u ndanë prioritete strategjike të rëndësishme, me theks në modernizimin e kapaciteteve energjetike dhe hartimin e projekteve të ardhshme të bashkëpunimit.
