Ministrja për Energjitikë, Miniera dhe Burime Minerale, znj. Sanja Bozhinovska, mori pjesë në Takimin Ministror në kuadër të Samitit Klimatik COP29 në Baku, Azerbajxhan, ku konfirmoi pjesëmarrjen aktive dhe mbështetjen e Maqedonisë së Veriut për dy iniciativa kyçe: COP29 Green Energy Pledge: Korridoret dhe Zonat e Energjisë të Gjelbër dhe COP29 Global Energy Storage and Grids Pledge.
Takimi Ministror për iniciativat energjetike të COP29 është një nga ngjarjet kyçe të Dajit të Energjisë në Samitin Klimatik në Baku, Azerbajxhan. Ky takim, i organizuar nga Presidenca e COP29 e Azerbajxhanit në bashkëpunim me UNIDO, Komisionin Ekonomik për Evropën të Kombeve të Bashkuara (UNECE), Bankën Aziane për Investime në Infrastrukturë (AIIB), Agjencinë Ndërkombëtare për Energjinë të Rinovueshme (IRENA) dhe partnerë të tjerë ndërkombëtarë të rëndësishëm, ka për qëllim lancimin e iniciativave globale energjetike: Korridoret dhe Zonat e Energjisë të Gjelbër, Iniciativa Globale për Ruajtjen e Energjisë dhe Rrjetet Elektrike.
Në ngjarje morën pjesë përfaqësues të lartë të qeverive të vendeve pjesëmarrëse, përfshirë ministren Sanja Bozhinovska, si dhe përfaqësues nga sektori privat, institucione financiare ndërkombëtare dhe donatorë dhe organizata filantropike kyçe. Takimi shërben si mundësi për mobilizimin global të mbështetjes dhe financimeve për inovacionet në sektorin energjetik, me theks në sistemet energjetike rezistente ndaj ndryshimeve klimatike dhe lidhjen e tregjeve energjetike në nivel global.
Këto iniciativa janë jetike për transformimin energjetik rajonal, dhe Maqedonia e Veriut është e angazhuar për implementimin e tyre.
Në kuadër të iniciativës Green Energy Pledge, vendet do të bashkëpunojnë për krijimin e korridoreve dhe zonave të energjisë të gjelbër. Këto korridore do të integrojnë burimet e rinovueshme në rrjetet kombëtare dhe rajonale të energjisë, duke stimuluar stabilitetin energjetik, rritjen e qëndrueshme ekonomike dhe mundësi të reja pune, duke reduktuar gjithashtu emetimet e gazrave serrë. Maqedonia e Veriut, përmes Strategjisë së Energjisë deri në vitin 2040 dhe Planit Kombëtar për Energjinë dhe Klimën, tashmë po punon për rritjen e kapaciteteve të burimeve të rinovueshme të energjisë, si dhe për krijimin e infrastrukturës për zona të gjelbra dhe parqe industriale që përdorin energji të rinovueshme.
Në të njëjtën kohë, me mbështetje për iniciativën Global Energy Storage and Grids Pledge, vendet angazhohen për investimin në kapacitete të reja për ruajtjen e energjisë dhe modernizimin e rrjetit elektrik, me qëllim arritjen e një kapaciteti global prej 1,500 GW për ruajtjen e energjisë deri në vitin 2030. Kjo do të mundësojë furnizimin e sigurt dhe stabil të energjisë dhe një integrim më efikas të burimeve të rinovueshme në rrjetet elektrike.
Kjo mbështetje për iniciativat e COP29 tregon angazhimin e Maqedonisë së Veriut për arritjen e qëllimeve të përbashkëta për një kalim të qëndrueshëm energjetik, duke kontribuar në luftën kundër ndryshimeve klimatike dhe forcuar sigurinë energjetike në rajon.
